Tag: solapur municipal corporation

सोलापूर,दि.12 : केंद्रशासनाच्या महत्वकांक्षी स्मार्ट सिटी योजनेतील सोलापूर स्मार्ट शहरात सुरू करण्यात आलेल्या 54 विविध विकास प्रकल्पापैकी 51 प्रकल्प निर्धारित वेळेत पूर्ण करण्यात येऊन मार्चअखेरपर्यंत पूर्ण झालेली कामे महापालिकेच्या ताब्यात देण्यात येतील अशी माहिती, स्मार्ट सिटी प्राधिकरणाचे मुख्य कार्यकारी अधिकारी त्र्यंबक ढेंगळे पाटील यांनी दिली. सोलापूर जिल्हा मराठी पत्रकार संघ आणि सोलापूर श्रमिक पत्रकार संघ यांच्या संयुक्त विद्यमाने संघाच्या कार्यालयात ढवळे पाटील यांचा वार्तालाप कार्यक्रम आयोजित करण्यात आला होता यावेळी त्यांनी स्मार्ट सिटीची संपूर्ण माहिती आणि सध्याची स्थिती यावर माहिती दिली.

प्रारंभी त्यांचे दोन्ही संघाचे अध्यक्ष विक्रम खेलबुडे आणि मनीष केत यांनी पुष्पगुच्छ आणि सन्मानचिन्ह देऊन स्वागत केले. साडेचार वर्षांपूर्वी देशातील शहरे स्मार्ट करण्याचा निर्णय घेतला होता, यामध्ये पहिल्या यादीत नवव्या क्रमांकावर सोलापूरचे नाव आले. स्मार्ट सिटी योजनेअंतर्गत सोलापुरात 54 प्रकल्पांसह 2300 कोटींच्या विकास कामांचा समावेश आहे.

यापैकी शहरातील दोन उड्डाणपूल, सीव्हीएस टर्सरी प्लांट व प्रोजेक्ट हे तीन मोठे प्रोजेक्ट वगळून उर्वरित 1069 कोटींची 51 विविध विकास प्रकल्प स्मार्ट सिटी प्राधिकरणाच्या अंतर्गत होत आहेत. यामध्ये 450 कोटी रुपयांचे दुहेरी जलवाहिनीचे प्रकल्प आहे. आज तागायत स्मार्ट सिटी योजनेतून बावीस प्रकल्प पूर्ण झाले आहेत. हे सर्व प्रकल्प महापालिकेच्या ताब्यात देण्याची प्रक्रिया सुरू आहे. या प्रकल्पाच्या कामाची तपासणी थर्ड पार्टी ऑडिट करून देण्यात येणार आहेत.

या पैकी 16 प्रकल्प महापालिकेकडे हस्तांतरित करण्याचा प्रस्ताव सादर करण्यात आला आहे. शहरातील स्मार्ट सिटी साठी काढण्यात आलेला परिसर यामधील ड्रेनेजची 93 टक्के, पाण्याच्या पाइपलाइनची 63 टक्के, आणि रस्त्यांची 57 टक्के, कामे पूर्ण झाली आहेत ही सर्व कामे 31 मार्चपर्यंत पूर्ण करण्यात येणार आहेत.

मागणीप्रमाणे शहराच्या हद्दवाढ भागात 3000 दिव्यांसाठीचे पोल लावण्यात आले आहेत. डिसेंबर अखेरपर्यंत उर्वरित सर्व पोल बसविण्याची प्रक्रिया पूर्ण होणार आहे शहरात 44000 एलईडी दिवे बसविण्यात आले आहेत. यासाठी लवकरच स्काडा प्रणाली कार्यान्वित होणार आहे.

सिद्धेश्वर मंदिर परिसरात फेब्रुवारी मार्चपर्यंत लेझरशो चेही काम पूर्ण होईल. शहरातील जुळे सोलापूर परिसरात मेन सिटी मध्ये पाणीपुरवठ्यासाठी कालबाह्य झालेल 1600 व्हॉल्व काढा प्रणालीसह बसविण्याचे काम पूर्ण करण्यात येणार आहे. 28 शाळा स्मार्ट करण्यात येणार आहेत. लक्ष्मी मंडई आधुनिकीकरण यासह कमांड कंट्रोल रूम आणि त्याद्वारे मिळणाऱ्या ऑनलाईन सेवा हे प्रकल्प निर्धारित वेळेत पूर्ण करण्यात येणार असल्याचेही त्यांनी बोलताना सांगितले.

सोलापूर,दि.26 : सोलापूर महानगरपालिकेच्या वतीने मालमत्ता कर वसुलीचे विशेष मोहीम सुरू करण्यात आली आहे. शहरातील थकबाकीदारांना महापालिकेतर्फे आवाहन करण्यात आले आहे की अभय योजना सुरू केलेली आहे.
या योजनेमध्ये शहरातील मालमत्ता कर थकबाकीदार ज्यांच्या टॅक्सवरती शास्ती लावण्यात आली आहे.

या योजनेअंतर्गत सोलापूर शहरातील नागरिकांना नोव्हेंबर महिन्यात मालमत्ता कर भरल्यास 80 टक्के शास्तीकर तर डिसेंबर महिन्यात मालमत्ता कर भरल्यास 70 टक्के व जानेवारी महिन्यात मालमत्ता कर भरल्यास 60 टक्के आणि मार्च महिन्यात मालमत्ता कर भरल्यास 50 टक्के टॅक्स वरील शास्तीवर सवलत देण्यात येणार आहे.

तरी सोलापूर शहरातील सर्व नागरिकांनी ज्यांचे मालमत्ता कर थकीत आहेत त्यांनी नोव्हेंबर महिन्यात कर भरून या योजनेचा लाभ घ्यावा.

मालमत्ता थकबाकीदार यांनी लवकरात लवकर कर भरल्यास त्यांना जास्त सूट मिळेल. महानगरपालिकेच्या वतीने जे थकबाकीदार अजिबात कर भरणार नाहीत अशा थकबाकीदारांच्या विरुद्ध जप्तीची कारवाई करण्यात येणार आहे.

याबाबत प्रक्रिया महापालिकेने सुरू केली आहे. थकबाकीदारांना महापालिकेच्यावतीने यापूर्वीच आवश्यक त्या नोटीस देण्यात आल्या आहेत. त्यांची सुनावणी देखील घेण्यात आली आहे. अशा पद्धतीने कारवाई उद्यापासून सुरू होत आहे. तरी शहरातील नागरिकांनी लवकरात लवकर थकबाकी भरावी असे आवाहन उपआयुक्त जमीर लेंगरेकर यांनी केले आहे.

सोलापूर,दि.23 : सोलापूर महानगरपालिकेच्या वतीने परिवर्तन सोलापूर ॲप (Parivartan Solapur App) तयार करण्यात आले असून, त्याची सुरुवात सोलापूर महानगर पालिकेचे आयुक्त पि. शिवशंकर यांनी केली आहे.

सोलापूर शहरातील सर्व नागरिकांना आपल्या हद्दीतील व सोलापूर शहरातील विविध तक्रारी “परिवर्तन सोलापूर ॲपच्या” मध्यमातून टाकता येईल. म.न.पा. च्या पाणी पुरवठा, नगर अभियंता, घनकचरा व्यवस्थापन, बांधकाम विभाग, आरोग्य विभाग, अतिक्रमण विभाग, कर संकलन विभाग, उद्यान विभाग, विद्युत विभाग, इत्यादी विभागांच्या तक्रारी देणे करिता महानगरपालिका अथवा विभागीय कार्यालय येथे जावे लागत होते. तसेच नागरिकांना दिलेल्या तक्रारीची स्थिती जाणून घेण्यासाठी वारंवार त्या कार्यालयात जावे लागत होते.

या करिता आयुक्त पि. शिवशंकर यांनी “परिवर्तन सोलापूर ॲप” हे मोबाईल ॲप सोलापूर शहरातील नागरिकांकरिता उपलब्ध करण्यात आले असून हे ॲप अँड्रॉइडच्या “प्ले स्टोर” व ॲपलच्या “ॲप स्टोर” मध्ये उपलब्ध करून देण्यात आले आहे. सदर ॲपवर तक्रार टाकल्यानंतर तक्रारीच्या फोटो व अक्षांश व रेखांश सहित (Geotagging) सदरची तक्रार संबंधित विभागाच्या L1 अधिकारी / कर्मचारी यांच्याकडे प्राप्त होती.

सदर विभागाच्या L1 अधिकारी / कर्मचारी यांनी नेमून दिलेल्या वेळेमध्ये सदर तक्रारीचे निराकरण केले नाही तर सदरची तक्रार ही L2 अधिकारी / कर्मचारी यांच्याकडे प्राप्त होईल. सदर विभागाच्या L2 अधिकारी / कर्मचारी यांनी नेमून दिलेल्या वेळेमध्ये सदर तक्रारीचे निराकरण केले नाही तर सदरची तक्रार ही L3 अधिकारी / कर्मचारी यांच्याकडे प्राप्त होईल. सदर तक्रार वेळेमध्ये निराकरण केले किंवा नाही या बाबत आयुक्त वेळोवेळी आढावा घेणार आहेत.

तरी सोलापूर शहरातील नागरिकांनी म.न.पा.च्या विविध विभागाशी निगडीत असलेल्या तक्रारी आपल्या मोबाईलच्या मध्यमातून टाकण्याची सोय करून देण्यात आली असून नागरिकांनी याचा उपयोग करावाअसे अहवान महापालिका आयुक्त पि. शिवशंकर यांनी केले आहे. सदरची ॲप बेंगलोरच्या “जनाग्रह” या NGO यांनी सोलापूर महानगरपालिकेस विनामूल्य विकसित करून दिलेली आहे.या पत्रकार परिषदेत मा.उपायुक्त जमीर लेंगरेकर,उपायुक्त धनराज पांडे आदी मान्यवर उपस्थित होते.