Tag: फसवणूक

दि.९ : चिनी ॲपच्या माध्यमातून २५० कोटींची फसवणूक करण्यात आल्याची घटना घडली आहे. कमी वेळात पैसे दुप्पट करून देण्याचे आमिष हे फसवणुकीचे कारण ठरू शकते हे माहिती असूनही अनेक लोक या दामदुप्पट परताव्याच्या आमिषाला बळी पडतात. असाच एक धक्कादायक प्रकार समोर आला आहे. उत्तराखंड एसटीएफने एका मोठ्या फसवणुकीच्या प्रकरणाचा पर्दाफाश केला आहे. एसटीएफने २५० कोटी रुपयांच्या फसवणुकीप्रकरणी उत्तर प्रदेशमधील नोएडा येथून एका आरोपीला अटक केली आहे. 

धक्कादायक बाब म्हणजे ही फसवणूक केवळ चार महिन्यांमध्ये करण्यात आली. चीनमधील स्टार्टअप योजनेंतर्गत तयार झालेल्या अ‍ॅपच्या माध्यमातून ही फसवणूक करण्यात आली. चीनच्या स्टार्टअप योजनेमधून पॉवर बँक अ‍ॅप विकसित करण्यात आले आहे. हे अ‍ॅप भारतामध्ये आतापर्यंत ५० लाखांहून अधिक लोकांनी डाऊनलोड केले आहे. या अ‍ॅपच्या माध्यमातून लोकांना १५ दिवसांत पैसे दुप्पट करण्याचे आमिष दाखवले जाते.  त्या माध्यमातून केवळ चार महिन्यांमध्ये या ठकसेनांनी २५० कोटी रुपयांचा चुना लोकांना लावला. 

ही फसवणूक करणारे बदमाश लोकांना पॉवर बँक अ‍ॅप डाऊनलोड करायला सांगत होते. जेव्हा लोकांकडून हे अ‍ॅप डाऊनलोड केले जायचे तेव्हा त्यांना १५ दिवसांत पैसे दुप्पट करण्याचे आमिष दाखवले जायचे. धक्कादायक बाब म्हणजे हा धंदा सुमारे चार महिने चालला होता. मात्र पोलिसांना याची खबर नव्हती. अखेर उत्तराखंडमधील हरिद्वार येथील एका व्यक्तीने केलेल्या तक्रारीनंतर या घटनेचा उलगडा झाला. 

तक्रारदाराने आपल्या तक्रारीत म्हटले की, पॉवर बँक अ‍ॅप नावाच्या अ‍ॅपमध्ये १५ दिवसांत पैसे दुप्पट करण्यासाठी त्यांनी दोन वेळा ९३ हजार ७२ रुपये जमा केले होते. मात्र पैसे दुप्पट झाले नाहीत. त्यानंतर मी पोलिसांत तक्रार केली. तक्रार मिळाल्यानंतर पोलिसांनी केलेल्या तपासामध्ये हे पैसे वेगवेगळ्या खात्यांमध्ये जमा झाल्याचे समजले. त्यानंतर पोलिसांनी आर्थिक व्यवहारांची तपासणी केली असता तब्ब्ल २५० कोटी रुपयांची फसवणूक झाल्याचे समोर आले.

या प्रकरणी उत्तराखंड एसटीएफने तपास करून नोएडा येथून पवन पांडेय या एका आरोपीला अटक केली. आरोपीकडून तब्बल ५९२ सिमकार्ड, १९ लॅपटॉप आणि पाच मोबाईल फोन जप्त करण्यात आले. एसटीएफने केलेल्या तपासात ही रक्कम क्रिप्टोकरंसीमध्ये बदलून परदेशात पाठवली जात असल्याचे समोर आले. दरम्यान, या प्रकरणाची माहिती आयबी आणि रॉ या संस्थांनाही देण्यात आली आहे.  

सोलापूर,दि.२४ : स्वस्तात सोने देण्याचे आमिष दाखवत विश्वासाने घरी बोलावून सत्तूर, तलवारीची भीती दाखवत मारहाण करून ४ लाख ५० हजार रुपये हिसकावून घेतल्याची धक्कादायक घटना वैराग मध्ये घडली. त्यामुळे स्वस्तात सोने घेणे महागात पडले. याबाबत हिरा अंबरग्या चव्हाण ( वय ३२ , रा . वारजे रामनगर , पुणे ) यांनी दिलेल्या फिर्यादीवरून सातजणांविरोधात वैराग पोलिसात फसवणुकीचा गुन्हा दाखल झाला आहे.

यात दोघा आरोपींना वैराग पोलिसांनी ताब्यात घेतले आहे. फिर्यादी हिरा चव्हाण हे कॉन्ट्रॅक्टरच्या हाताखाली व स्वतः कामे घेत गवंडी कामकरून आपली उपजीविका भागवितात. याचदरम्यान मध्यंतरी वैराग येथील सचिन जहांगीर भोसले हे पुणे येथे मोलमजुरीसाठी गेले असता काम देण्याची विनंती केल्याने त्यालाही फिर्यादीकडून काम देण्यात आले होते. परंतु सध्या कोरोना लॉकडाउनमुळे सचिन मूळगावी वैराग येथे राहण्यास आला.

सचिन याने फोनवरून स्वस्तात सोने देतो, असे सांगितल्यावरून फिर्यादी हिरा चव्हाण हे भाऊजी किसन धारिया राठोड ( कर्नाटक ) यांच्यासोबत वैराग येथे आले होते. यावेळी त्याने दिलेल्या सोन्याचा तुकडा खात्रीसाठी घेऊन पुन्हा मूळ गावी गेले होते. तेथील सोनाराला तो तुकडा दाखवून सोने खरे असल्याची खात्री पटल्याने स्वस्तातील सोने घेण्यासाठी व्याजाने पैसे काढून ४ लाख ५० हजार रुपये घेऊन आले होते. यावेळी सचिन भोसले याच्या घरी रात्री आठ वाजण्याच्या सुमारास आल्यानंतर अर्धा किलो सोने तराजूमध्ये मोजले जात असताना सोन्याविषयी शंका आली.

तेव्हा संशयित आरोपी सचिन जहांगीर भोसले, त्याचे वडील जहांगीर भोसले, शोभा भोसले ( सर्व रा. वैराग ) व तीन अनोळखी पुरुष व एक महिला यांनी दमदाटी करून मारहाण केली. तर कोयत्याने व तलवारीने ठार मारण्याच्या उद्देशाने अंगावर आले. यावेळी जीव वाचविण्याच्या भीतीपोटी दोघांनी सोडून देण्याची याचना केली असता बाहेर कोणीतरी आल्याचे कांगावा करून आरोपींनी ४ लाख ५० हजार रुपये हिसकावून घेऊन पळून गेले. यानंतर फिर्यादीने कसेबसे वैराग एस.टी. स्टँड गाठून परत आपल्या गावी पुणे येथे गेल्यानंतर घडला प्रकार नातेवाइकांना सांगितलर. त्यानंतर उशिराने येऊन वैराग पोलिसात फसवणुकीची फिर्याद दिली.

सोलापूर,दि.१२ : कर्जाचे आमिष दाखवून व्यंकटेश पांडुरंग सामल ( वय २६, रा. चिप्पा मार्केटजवळ, युनिक होम ) या तरुणाची फसवणूक केली. चार लाखांचे कर्ज देण्यासाठी आरोपींनी आठ लाखांपेक्षा जास्त रक्कम लाटली. ऑक्टोबर ते डिसेंबर २०२० दरम्यान हा प्रकार घडला.

याप्रकरणी आनंद अगरवाल, प्राची देसाई व मिलिंद महाजन यांच्याविरुध्द जेलरोड पोलीस ठाण्यात फसवणुकीचा गुन्हा दाखल करण्यात आला आहे. ऑक्टोबर २०२० मध्ये एका फायनान्स कंपनीतून बोलत असल्याचे सांगून आरोपी आनंदने फोन केला. त्याने बिगरव्याजाने चार लाखांपर्यंत कर्ज मिळेल असे फिर्यादीला सांगितले.

पण पहिला हप्ता भरल्यानंतरच कर्जाची रक्कम बँक खात्यात जमा होणार असेही आरोपीने फिर्यादीला सांगितले. त्यानंतर फिर्यादीला आरोपी प्राची आणि मिलिंद यांनी फोन केला. त्यांनी प्रकरणासाठीचा खर्च सांगून वेळोवेळी पैशाची मागणी केली. त्याप्रमाणे व्यंकटेश यांनी आरोपीच्या बँक खात्यात ८ लाख ३५ हजार ७०० रुपये भरले. परंतु फिर्यादीला कर्ज न देता आरोपींनी त्यांची फसवणूक केली. या गुन्ह्याचा तपास पोलीस उपनिरीक्षक बादोले हे करीत आहेत.

सोलापूर,दि.११ : घरबसल्या जादा पैसे मिळवा, अशी जाहिरात करुन व मोबाइल कंपनीत नोकरीस लावतो, असे सांगून तिघांनी फोन पे व गुगल पे वरून वेळोवेळी ३ लाख २० हजार ८०० रुपये मागवून घेऊन रानमसले येथील एका २८ वर्षीय शेतकऱ्याची फसवणूक केल्याप्रकरणी सीबीआयमध्ये गोपनीय रिपोर्टर असल्याची बतावणी करणाऱ्या लातूर येथील एक व लांबोटी येथील दोघे अशा तिघांच्या विरोधात फसवणुकीचा गुन्हा दाखल करण्यात आला आहे.

उत्तर सोलापूर तालुक्यातील रानमसले येथील आकाश अर्जुन शिंदे यांची शिरापूर येथे लातूर येथील सागर आगलावे याच्याशी ओळख झाली. त्यावेळी सागर याने आकाश यास मी सीबीआयमध्ये रिपोर्टर असून गोपनीय कामानिमित्त येथे आलो आहे, असे सांगत एका मोबाइल कंपनीमध्ये घरबसल्या जादा पैसे कमवा अशी जाहिरात केली. तसेच कंपनीमध्ये काम लावतो, असे सांगून सागर व त्याचे लांबोटी येथील दोन मित्र अजय विष्णू पाटील व सचिन लवटे या तिघांनी ३१ डिसेंबर २०१९ ते ४ नोव्हेंबर २०२० या कालावधीमध्ये वेळोवेळी आकाश यांच्या फोन पे व गुगल पे या दोन्ही अकाउंटवरून एकूण ३ लाख २० हजार ८०० रुपये इतकी रक्कम मागवून घेतली.

दरम्यान, कुरिअरद्वारे लॅपटॉप येईल, तू काळजी करू नको असे सांगितले. परंतु वारंवार त्यांच्याकडे चौकशी केली असता आपली फसवणूक झाल्याचे लक्षात आल्याने आकाश यांनी मोहोळ पोलीस ठाण्यात त्या तिघांविरोधात फसवणुकीचा गुन्हा दाखल केला. अधिक तपास पोलीस हवालदार राठोड हे करीत आहेत.

अंबरनाथ,दि.10 : नोकरीच्या आमिषाने फसवणुकीचे प्रकार अनेकवेळा घडतात. नोकरीच्या आमिषाने अनेकजण लाखो रुपये देतात. नोकरीची गरज ओळखूनच फसवणूक करणाऱ्यांचे धाडस वाढत आहे. नोकरी देण्याच्या नावाखाली तरुणांची फसवणूक करणाऱ्यांच्या टोळीचं पितळ पुन्हा एकदा उघडं पडलं आहे. रेल्वेत नोकरी लावण्याच्या बहाण्याने तरुणांना लाखो रुपयांचा गंडा घालण्यात आल्याचा प्रकार अंबरनाथ पोलिसांनी उघड केला आहे. (Fraud of lakhs of rupees in the name of giving jobs to the youth in the railways) याप्रकरणी आयआरसीटीसीच्या एका कर्मचाऱ्याला पोलिसांनी बेड्या ठोकल्या आहेत. कैलास राजपाल सिंह अस या भामट्याच नाव आहे.

बदलापूरला राहणारा कुमार चव्हाण हा नोकरीच्या शोधात असतानाच त्याला कैलास राजपाल सिंग या भामट्याने रेल्वेत नोकरी लावून देण्याचं आमिष दाखवलं. कैलास आयआरसीटीसीच्या चर्चगेट स्टेशनवरील कँटीनमध्ये काम करत होता.

खोटी परीक्षा, खोटी मुलाखत घेऊन पास होण्यासाठी 5 लाख रुपये त्याने कुमार चव्हाण याच्याकडून उकळले. आपली अधिकाऱ्यांशी ओळख असल्याचं सांगून त्याने त्याला खोटं नियुक्तीपत्रही दिलं. मात्र हा सगळा प्रकार खोटा असून आपली फसवणूक झाल्याचं लक्षात येताच कुमार याने पोलिसात धाव घेतली.

अंबरनाथ पोलिसांनी याप्रकरणी गुन्हा दाखल केला. कैलाश दर एक ते दोन महिन्यांनी राहण्याचा ठावठिकाणा बदलत होता. अखेरीस विरारहून त्याच्या मुसक्या आवळण्यात पोलिसांना यश आलं. यानंतर या संपूर्ण प्रकरणात रेल्वेचे दोन अधिकारीसुद्धा सहभागी असल्याची धक्कादायक माहिती समोर आली. कैलास सिंह हा या अधिकाऱ्यांना नवी गिऱ्हाईकं शोधून द्यायचा, तर हे अधिकारी बनावट लेटरहेड आणि शिक्के वापरुन फसवणूक करत असल्याचं समोर आलं आहे. पोलीस आता या दोन रेल्वे कर्मचाऱ्यांचा शोध घेत आहेत. अशाच पद्धतीनं या त्रिकुटाने अनेकांना गंडा घातल्याची शक्यता असून त्यादृष्टीने पोलीस तपास करत आहेत.

सोलापूर,दि.२४ : भूम तालुक्यातील शेतकऱ्याची तूर लॉकडाउन सुरू होण्यापूर्वी बार्शीतील व्यापाऱ्याकडे विक्रीसाठी दिली होती. मात्र, कोणताही माल ठेवला नसल्याचे सांगत २५ टन ७९५ किलो वजनाची अंदाजे १८ लाख ७५ हजार रुपयांची फसवणूक बार्शीतील व्यापाऱ्यांनी केली आहे. याप्रकरणी तालुका पोलीस ठाण्यात दोघांविरुध्द गुन्हा दाखल झाला आहे. याप्रकरणी नरहरी साहेबराव अंधारे ( वय ७८, रा. माणकेश्वर ) यांनी तालुका पोलिसात फिर्याद दिली आहे.

या फिर्यादीनुसार अंधारे यांनी २५ टन ७९५ किलो इतकी तूर बार्शीतील पंडित जवाहरलाल नेहरु मार्केट यार्डातील ओळखीचे व्यापारी किरण शिराळ या अडत व्यापाऱ्याकडे १० व १९ फेब्रुवारी २०२० रोजी विक्रीसाठी ठेवली होती. तूर दिली त्यावेळी ४५०० ते ४७०० रुपये इतका तुरीला भाव होता. तुरीला ७५०० रुपये भाव येईपर्यंत विकायची नाही, असे फिर्यादीने संबंधित व्यापाऱ्याला सांगितले होते. त्यावेळी शिराळ यांनी सांगितले की , तुरीला एवढा भाव येण्यास पाच ते सात महिने लागतील.

यानंतर शिराळ यांनी संतोष बागमार यांच्या भोयरे येथील वेअर हाऊसला तुरी ठेवल्या. याची पावती मागितली असता पावती बुक संपल्याचे फिर्यादीस सांगण्यात आले. एक आठवड्याने फिर्यादी बागमार यांच्याकडे पावती मागण्यास गेले असता शिराळ यांच्याकडे पावती दिली असल्याचे ते म्हणाले.

यानंतर लॉकडाउन लागले. लॉकडाउन संपल्यानंतर पावती मागण्यासाठी फिर्यादी पुन्हा शिराळ यांच्याकडे गेले, तेव्हा शिराळ म्हणाले काळजी करू नका तुमची पावती सुरक्षित आहे. २५ सप्टेंबर २०२० रोजी शिराळ यांच्याकडे फिर्यादी गेले. मात्र, त्यांचे अडत दुकान बंद होते. यानंतर बागमार यांच्याकडे ठेवलेल्या तुरीचा माल मागण्यासाठी फिर्यादी अंधारे गेले असताना बागमार यांनी नकार दिला.

पुढे किरण शिराळ यांच्या घरी चौकशी करण्यासाठी अंधारे गेले, तेव्हा त्यांनीही उडवाउडवीची उत्तरे दिली. पुन्हा बागमार यांच्याकडे चौकशीला गेल्यानंतर त्यांनी किरण ट्रेडिंग कंपनीतर्फे आवक व जावकच्या नोंदी गोडाऊन किपरने दाखविल्या. शिराळ यांच्याकडे ठेवलेली तूर परत घेतली नाही व तूर परत घेतल्याबाबत पावतीवर कुठेही सही केलेली नाही. यानंतर नरहरी अंधारे यांनी तालुका पोलिसांत याबाबत फिर्याद दिली.

दि.2 : फेसबुक फ्रेंडशीपच्या (Facebook friendship) माध्यमातून 10 लाख रुपयांचा गंडा घातल्याची घटना घडली आहे. नागपूरातील एका 66 वर्षीय वृद्ध व्यक्तीला गंडा घातला आहे. लंडनच्या एक कथित मैत्रिणीने गंडा घातला आहे. कस्टम ड्युटीच्या नावाखाली सेवानिवृत्त वृद्धाचे 10 लाख रुपये या मैत्रिण आणि तिच्या टोळीने लंपास केले आहे. पोलिसांनी याप्रकरणी फसवणुकीचा गुन्हा दाखल केला असून तपास सुरु केला आहे.

66 वर्षीय नागपूरमधील वृद्धाची काही महिन्यांपूर्वी फेसबुकवर लिडा थॉमसन नावाच्या महिलेशी ओळख झाली होती. आधी चॅटिंग नंतर फोनवर सतत बोलणे होऊ लागले. लिडाने तिचे लंडनमधील अनेक नामांकित ठिकाणांवरचे फोटो दाखवून नागपुरातील या वृद्ध व्यक्तीला भुरळ घातली. लॉकडाऊनच्या काळात अचानक एक दिवशी लिडाने ती भारतात येऊ इच्छिते आणि तिच्याकडील कोट्यवधी रुपयांनी भारतात सेवा कार्य करू इच्छिते असं सांगितले. नागपुरातील या वृद्ध मित्रानेही तिला होकार दिला.

अचानक एकेदिवशी लिडाचा पुन्हा फोन आला आणि ती दिल्ली एयरपोर्टवर अडकली असून तिला कस्टम अधिकाऱ्यांनी थांबवल्याची थाप मारली. तिच्याकडे भारतात सेवा कार्यासाठी आणलेले 2 कोटी रुपये असल्याने तिला कस्टमवाले 10 लाख कस्टम ड्युटी भरल्याशिवाय बाहेर निघू देत नाही आहे, असं लिडाने सांगितले. सोबतच फोनवरून बनावट एयरलाईनचे अधिकारी आणि बनावट कस्टम अधिकारी यांच्याशी बोलणे करून दिले.

आपल्या मैत्रिणीच्या आकर्षणात पुरते अडकलेले वृद्ध या जाळ्यात अडकले आणि त्यांनी 9 लाख 66 हजार रुपए लिडाने सांगितलेल्या बँक खात्यात पाठवले. त्यांनतर लिडा बेपत्ता झाली आणि एयरलाईन व कस्टम अधिकारीही बेपत्ता झाले.

अनेक आठवडे लिडाची वाट पाहिल्यानंतर आपली फसवणूक झाल्याचे लक्षात आल्यानंतर वृद्ध व्यक्तीने काल बजाजनगर पोलीस स्टेशनमध्ये फसवणुकीची तक्रार नोंदवली आहे. पोलिसांनी लिडा आणि सहकाऱ्यांच्या विरोधात फसवणुकीचा गुन्हा नोंदवून तपास सुरू केला आहे. मात्र, आतापर्यंतच्या तपासात वृद्धासोबत बोलणारी महिला कधीच लंडनमधून बोलत नव्हती तर ती दिल्लीतूनच बोलत होती, असं समोर आले आहे. वृद्ध, सेवानिवृत्त, महिला, विद्यार्थी असे घटक या भामट्यांचे टार्गेट असतात, त्यामुळे त्यांनी जास्त सावध राहण्याची गरज असल्याचे पोलीस निरीक्षक वर्षा देशमुख यांनी म्हटलं आहे.