Tag: पंढरपूर

सोलापूर,दि.3 : भारतात अजून सुद्धा अंधश्रद्धेचा प्रकार आढळून येतात. मुलगा होत नसल्याच्या कारणाने स्वतःच्या पत्नीसह तीन मुलींना घरात डांबून ठेवल्याची धक्कादायक घटना पंढरपूरमध्ये घडली आहे. डांबून ठेवलेल्या पीडित विवाहित महिलेसह तीन मुलींची निर्भया पथकाकडून सुटका करण्यात आली आहे. मुलासाठी आजही असे अतिशय धक्कादायक प्रकार घडणं चिंताजनक आहेत. यातील आरोपी पती दत्तात्रय बर्डे याच्या विरोधात पंढरपूर पोलीस ठाण्यात गुन्हा दाखल करण्यात आला आहे.

मुलगा होत नाही म्हणून आरोपी दत्तात्रय बर्डेने पंढरपूर शहरातील झेंडे गल्लीतील एका घरात दीड वर्षापासून पत्नीसह तीन मुलींना डांबून ठेवलं होतं. या काळात त्याने आपल्या पत्नी आणि मुलींचा शारीरिक आणि मानसिक छळ केल्याची माहिती समोर येत आहे. निर्भया पथकाला या घटनेची माहिती मिळाली. त्यांनी ही माहिती उपविभागीय पोलीस अधिकारी विक्रम कदम आणि पोलीस निरीक्षक अरुण पवार यांना देण्यात आली. त्यांच्या मार्गदर्शनाखाली पोलीस उपनिरीक्षक सुरेश घुले, गणेश इंगोले, अरबाज खाटीक, कुसुम क्षीरसागर, निता डोकडे, चंदा निमगिरे आणि अविनाश रोडगे यांनी साध्या वेशात घटनास्थळी जाऊन कारवाई करत त्यांची सुटका केली.

यावेळी संबंधित महिला आणि तिन्ही मुली अत्यंत घाबरलेल्या खोलीतील कोपऱ्यात बसलेली दिसून आली. दीड वर्षांपासून समाजापासून दूर एका खोलीत डांबून ठेवल्याने ही महिला आणि मुली अतिशय घाबरलेल्या अवस्थेत आढळून आल्या. पोलिसांनी आरोपीला तात्काळ अटक करुन न्यायालयात हजर केले असता त्याला 4 जूनपंर्यंत पोलीस कोठडी सुनावण्यात आली आहे.

सोलापूर,दि.21 : उपमुख्यमंत्री अजित पवार यांच्या सभेत भगीरथ भालके यांना उमेदवारी देण्यास विरोध करणाऱ्या कार्यकर्त्याला मारहाण करण्यात आली आहे. पंढरपूर विधानसभा मतदारसंघात होणाऱ्या पोटनिवडणुकीत भगीरथ भालके यांना उमेदवारी देण्यास विरोध करणाऱ्या राष्ट्रवादी काँग्रेसच्या (NCP) कार्यकर्त्याला भालके समर्थकांकडून मारहाण करण्यात आल्याचा प्रकार समोर आला आहे. विशेष म्हणजे उपमुख्यमंत्री अजित पवार आणि जयंत पाटील यांच्या सभेतच या कार्यकर्त्याला मारहाण करण्यात आली. यावरुन स्थानिक पातळीवर राष्ट्रवादी काँग्रेस पक्षात तणाव निर्माण होण्याची शक्यता आहे.

राष्ट्रवादी काँग्रेसचे अध्यक्ष शरद पवार यांना विद्यार्थी सेवक किरण घोडके यांनी पत्र लिहून भालके कुटुंबीयांना उमेदवारी न देण्याची मागणी केली होती. भालके गटाचे वर्चस्व असणार्या विठ्ठल कारखान्याचे कामगार वेतन व शेतकऱ्यांची देणी थकली असल्याने विधानसभा पोटनिवडणुकीत भगीरथ भालके यांना उमेदवारी मिळू नये, असे किरण घोडके यांनी पत्रात म्हटले होते. याचाच राग मनात ठेवून भालके समर्थकांनी भरसभेत किरण घोडके यांना जबरदस्त मारहाण केली. त्यामुळे आता राष्ट्रवादी काँग्रेसच्या नेतृत्त्वाकडून संबंधित कार्यकर्त्यांवर कारवाई केली जाणार का, याकडे सर्वांचे लक्ष लागले आहे.

सोलापूर,दि.18: भारत निवडणूक आयोगाने पंढरपूर विधानसभा मतदारसंघासाठी पोटनिवडणूक घोषित केली असून या मतदारसंघात 17 एप्रिल 2021 रोजी मतदान होणार आहे. मतदानासाठी जिल्हा प्रशासन सज्ज असून मतदारसंघात मुख्य मतदान केंद्रे 328 आणि सहायक मतदान केंद्रे 196 अशी एकूण 524 मतदान केंद्रावर मतदान होणार आहे. यासाठी 3965 अधिकारी, कर्मचाऱ्यांची नेमणूक केल्याची माहिती जिल्हा निवडणूक अधिकारी तथा जिल्हाधिकारी मिलिंद शंभरकर यांनी दिली.

पंढरपूर मतदारसंघ मतदान तयारीविषयीची माहिती पत्रकार परिषदेत जिल्हाधिकारी शंभरकर यांनी दिली. यावेळी त्यांनी सांगितले की, निवडणुकीची अधिसूचना 23 मार्च, नामनिर्देशन पत्रे सादर करण्याचा अंतिम दिनांक 30 मार्च, नामनिर्देशन पत्राची छाननी 31 मार्च, उमेदवारी अर्ज मागे घेण्याचा दिनांक 3 एप्रिल, मतदानाचा दिनांक 17 एप्रिल, मतमोजणी 2 मे 2021 रोजी होणार आहे.

पंढरपूर मतदारसंघात पंढरपूर आणि मंगळवेढा तालुक्यातील गावांचा समावेश होतो. मतदारसंघात एक लाख 77 हजार 387 पुरूष, एक लाख 62 हजार 148 महिला आणि 5 तृतीयपंथी, असे एकूण तीन लाख 39 हजार 540 मतदार मतदानाचा हक्क बजावतील. 2019 मध्ये या मतदारसंघात दोन लाख 39 हजार 690 जणांनी मतदानाचा हक्क बजावला होता. 71.85 टक्के मतदान झाले होते. निवडणुकीत 1050 बॉलेट युनिट, 1016 कंट्रोलिंग युनिट, 1009 व्हीव्ही पॅटचा वापर मतदानासाठी होणार आहे. 524 मतदान केंद्रावर मतदान कर्मचारी 3150, 60 सेक्टर अधिकारी, विविध पथकातील कर्मचारी 205 आणि 550 पोलीस कर्मचारी अशा एकूण 3965 मनुष्यबळाची नेमणूक करण्यात येणार असल्याचे शंभरकर यांनी सांगितले.

कोविड-19 चे सर्व नियम पाळून मतदान प्रक्रिया पार पडणार आहे. यासाठी 1210 आरोग्य कर्मचारी/आशा कर्मचारी यांची नेमणूक करण्यात येणार असून प्रत्येक केंद्रावर सॅनिटायझर, तापमान तपासणीसाठी 550 थर्मल गन, 4500 फेस शिल्ड, 4500 हॅन्ड ग्लोज आणि 5000 मास्क यांची व्यवस्था करण्यात येणार आहे. आदर्श आचारसंहितेचे पालन करण्यात येणार असून मतदारांनी जास्तीत जास्त मतदान करण्याचे आवाहन शंभरकर यांनी केले आहे.

सोलापूर,दि.२० : कोरोना रूग्णांची संख्या परत वाढत आहे. सोलापूर जिल्ह्यातही कोरोना रुग्णसंख्या वाढत आहे. वाढत्या कोरोना रुग्णांच्या संख्येमुळे यंदा पंढरपुरातील माघी यात्राही भक्ताविना साजरी होणार आहे. यात्रेसाठी २२ फेब्रुवारी रात्री १२ वाजल्यापासून २३ फेब्रुवारी रात्री १२ पर्यंत २४ तासाची संचारबंदी जाहीर करण्यात आली आहे.

कोरोनामुळे यात्राकाळात कोणत्याही भाविकाला पंढरपूर शहरात येता येणार नाही. ही संचारबंदी पंढरपूर शहरासह परिसरातील १० गावात असणार आहे.

पंढरपुरसह काही गावात संचार बंदी
कमी झालेला कोरोना संसर्गजन्य रोग पुन्हा वाढताना दिसून येत आहे. यामुळे तीन दिवसावर आलेल्या माघ वारी संदर्भात शासनाने शुक्रवारी आदेश काढले आहेत. यामध्ये २२ फेब्रुवारी रात्री १२.०० वा. पासून ते २३ फेब्रुवारी रोजी रात्री १२.०० वा. पर्यंत (२४ तास) पंढरपूर शहराच्या आजूबाजूस असणारी गावात संचारबंदी अनेक सूचना दिल्या आहेत. त्या सूचना पुढील प्रमाणे आहेत.

●संचारबंदी :-
माघवारी निमित्त ३ ते ४ लाख भाविक पंढरपूरमध्ये असतात. माघवारी निमित्त कोरोनाच्या पार्श्वभुमी लक्षात घेता भाविक पंढरपूरमध्ये येऊ नयेत व पंढरपूर मध्ये गर्दी होऊ नये यासाठी दिनांक २२/२/२०२१ रोजी रात्री १२.०० वा. पासून ते दि.२३/२/२०२१ रोजी रात्री १२.०० वा. पर्यंत (२४ तास) पंढरपूर शहराच्या आजूबाजूस असणारी भटूंबरे, चिंचोळी भोसे, शेगांव दु, लक्ष्मी टाकळी, गोपाळपूर, वाखरी, कोर्टी, गादेगाव-शिरढोण व कौठाळी इत्यादी गावांमध्ये व संपूर्ण पंढरपूर शहरात आपत्ती व्यवस्थापन अधिनियम २००५ तसेच भारतीय साथ रोग नियंत्रण अधिनियम १८९७ मधील तरतुदीन्वये संचारबंदी आदेश लागू करणेत येत आहे. त्याबाबतचे स्वतंत्र आदेश निर्गमित करणेत येत आहे. सदर आदेशाचे पालन करणे सर्व सबंधितांवर बंधनकारक राहील.

●प्रवासी वाहतूक सेवा नियंत्रीत करणे :-
माघी वारीला बहुसंख्य वारकरी हे रेल्वे, एस.टी.महामंडळाची वाहने, खाजगी गाडयामधून येत असतात. माघ शुद्ध दशमी (दि.२२/०२/२०२१) व माघ शुद्ध एकादशी (दि.२३/०२/२०२१) या काळात ही वाहतूक सेवा पुर्णपणे बंद न करता नियंत्रीत ठेवावी, जेणेकरून सर्वसामान्य प्रवासी, वैद्यकिय सेवा व इतर सेवा चालू राहतील. मंदिर परिसरापासून दूरवर अंतरावर सर्वसामान्य प्रवासी उतरेल याबाबत आवश्यक ते नियोजन पोलीस विभाग, परिवहन विभाग व एस.टी.महामंडळ हे करतील.

●पायी दिंडयांना प्रतिबंध करणे:-
माघी यात्रेला राज्यभरातून ०३ ते ०४ लाख वारकरी राज्याच्या विविध भागातून येतात. राज्यभरातून २५० पेक्षा जास्त पायी दिंडया या काळात पंढरपूरला येतात. या दिंडया मराठवाडा, कोकण, विदर्भ, कर्नाटक, आंध्र, दक्षिण महाराष्ट्र या ठिकाणाहून येतात. कोरोना विषाणूजन्य आजाराच्या पार्श्वभुमीवर या पायी दिंडयांना पंढरपूर दिशेने प्रस्थानास बंदी करणेत येत आहे.

●मठांतील वारकरी संख्या नियंत्रीत असावी:-
पंढरपूर शहर व परिसरामध्ये जवळपास १२०० मठ असून यात्रेपूर्वी काही दिवस अगोदर या मठामध्ये बाहेरगावाहून वारकरी वास्तव्यास येण्याची शक्यता आहे. तसेच ६५ एकर परिसर, चंद्रभागा नदीपात्र याठिकाणीही वारकरी वास्त्यव्यास येत असतात. स्थानिक नगर परिषदेकडून वारी संपेपर्यंत मठांची दररोज तपासणी करणेत यावी. मठामध्ये नव्याने येणा-या सर्व लोकांना बंदी करणेबाबतच्या उपाययोजना उपविभागीय अधिकारी पंढरपूर व मंदिर समिती हे करतील. व त्यास प्रसिध्दी देतील. पोलीस विभागामार्फत मठ प्रमुखांच्या बैठका घेणेत येवून त्यांना सीआरपीसी १४९ प्रमाणे नोटिस बजावतील.

●आरोग्य व्यवस्थापन :-
आरोग्य विभाग हा पोलीस कर्मचारी, महसूल कर्मचारी, नगर पालिका प्रशासन तसेच इतर विभागाचे सर्व संबंधीत अधिकारी व कर्मचारी यांची थर्मलस्क्रीनिंग करेल. तसेच पल्स ऑक्सी मीटरच्या सहाय्याने शरीरातील ऑक्सीजनची तपासणी करेल. मंदिर समिती सदस्य, सल्लागार समिती सदस्य, शासकीय कर्मचारी अधिकारी, यांच्या तपासणीसाठी Antigen Test kit 4/6 उपलब्धता करणेत येईल. तसेच १०८ ची रुग्णवाहिका सोबतच Cardiac Ambulance ही ठेवण्याचे नियोजन करणेत यावे. On Duty Staff ची काळजी घेणेसाठी त्यांना N-९५ मास्क, सॅनिटायझर उपलब्ध करुन देणेत यावे.

● श्री.विठ्ठल रूक्मिणी मातेच्या दर्शनाबाबत- संपूर्ण देशात व राज्यात कोविड-१९ संसर्गाचा धोका अदयापही कायम असल्याने व माघ यात्रेमध्ये भाविकांची होणारी गर्दी विचारात घेऊन कोरोना विषाणूंचा प्रादुर्भाव वाढू नये यासाठी मागील सात-आठ महिन्यामध्ये संपूर्ण गहाराष्ट्रात ज्याप्रमाणे रार्व धार्गिक सण यात्रा / यात्रा अत्यंत साध्या पध्दतीने लोकांनी एकत्रित न येता साजरे केले आहेत. त्याप्रमाणे माघ यात्रेला होणारी गर्दी व कोरोना विषाणूंचा प्रादुर्भाव लक्षात घेता श्रींचे दर्शन माघ शुध्द दशमी (दि.२२/२/२०२१ ) व माघ शुध्द एकादशी (दि.२३/२/२०२१) या दिवशी बंद ठेवणेत यावे. तथापि श्रींचे परंपरेनुसार चालत असलेले सर्व नित्योपचार मंदिर समितीमार्फत कायम राहील. मंदिर व मंदिर परिसरात गर्दीवर नियंत्रण ठेवणेसाठी मंदिर समिती, उपविभागीय अधिकारी व पोलीस विभाग यांचेमार्फत आवश्यक त्या उपाययोजना कराव्यात. उपरोक्त विधीवत पुजा करताना सबंधितांनी मास्कचा वापर करणे, सोशल डीस्टनसिंग चे पालन करणे, हात साबणाने स्वच्छ धुणे व आवश्यक तेथे सॅनिटायझरचा वापर करणे बंधनकारक राहील.

पंढरपूर,दि.३ : कोरोनाबाबत खबरदारी घेण्यासाठी माघी यात्रा काळात दशमी व एकादशी असे दोन दिवस विठुरायाचे दर्शन बंद ठेवण्याचा निर्णय श्री विठ्ठल रुक्मिणी मंदिर समितीच्या बैठकीत घेण्यात आल्याची माहिती समितीचे सहअध्यक्ष गहिनीनाथ महाराज औसेकर यांनी दिली. कोरोनामुळे सर्वात प्रथम चैत्री, यानंतर आषाढी, कार्तिकी व आता माघी वारीत देखील विठुरायाचे दर्शन बंद राहणार असल्याने वर्षातील चारही वाऱ्या भाविकांविना होणार आहेत.

इतिहासात प्रथमच असे घडले आहे. यामुळे भाविकांमध्ये नाराजी आहे. दरम्यान, माघी वारीसंदर्भात चर्चा करण्यासाठी मंदिर समितीची बैठक भक्तनिवास येथे पार पडली. यास सदस्य भास्करगिरी महाराज, ज्ञानेश्वर महाराज जळगावकर, संभाजी शिंदे, ॲड. माधवी निगडे, शकुंतला नडगिरे, कार्यकारी अधिकारी विठ्ठल जोशी, व्यवस्थापक बालाजी पुदलवाड आदी उपस्थित होते. कोरोना अद्याप हद्दपार झाला नसल्यानेच राज्य सरकारने २८ फेब्रुवारीपर्यंत निबंध जाहीर केले आहेत. तर माघी एकादशी २३ फेब्रुवारी रोजी आहे. राज्य शासनाच्या आदेशाला अनुसरून मंदिर समितीने देखील माघी दशमी व एकादशी म्हणजे २२ व २३ फेब्रुवारी रोजी श्री विठ्ठल रुक्मिणीचे मंदिर बंद ठेवण्याचा निर्णय आजच्या बैठकीत घेतला.

माघी वारीस तीन लाखांहून अधिक भाविक हजेरी लावतात. ही गर्दी टाळण्यासाठीच मंदिर समितीने सदर निर्णय घेतला असल्याचे औसेकर महाराज यांनी सांगितले. विशेष म्हणजे वारीसंदर्भात अद्याप शासनाने कोणताच निर्णय जाहीर केला नाही. त्यापूर्वीच समितीने मंदिर बंद ठेवण्याचा निर्णय घेतल्याने राज्य शासन देखील यास अनुकूल निर्णय घेणार असल्याचे स्पष्ट झाले आहे.

आषाढी व कार्तिकी वारीप्रमाणे माघी काळातही एक किंवा दोन दिवस संचारबंदीचा आदेश होऊ शकतो. कोरोनामुळे १७ मार्चला विठुरायाचे मंदिर दर्शनासाठी बंद करण्यात आले होते. त्यानंतर नऊ महिन्यानंतर दिवाळी पाडव्याला देवाचे मुखदर्शन सुरू करण्यात आले. यानंतर कार्तिकी वारीला दर्शन बंद ठेवण्यात आले होते व आता पुन्हा माघी वारीला दोन दिवस मंदिर बंद राहणार आहे.

रेडिओ वाहिनीबाबत सांस्कृतिकमंत्र्यांना भेटणार
श्री विठ्ठल रुक्मिणी मंदिर समितीसह मानाच्या सात पालख्यांचे संस्थान मिळून रेडिओ वाहिनी सुरू करण्याची चर्चा सुरू आहे. याबाबत कोल्हापूर येथील धैर्यशील देशमुख यांनी पुढाकार घेतला आहे. दरम्यान याबाबत अंतिम निर्णय घेण्यासाठी गहिनीनाथ महाराज औसेकर व देशमुख हे सांस्कृतिकमंत्री अमित देशमुख यांची भेट घेणार आहेत. देशमुख यांच्याबरोबर बैठक घेतल्यानंतर यास अंतिम स्वरूप येईल, असे औसेकर महाराज यांनी सांगितले.